喺突破做咗一個幾月嘅實習生，雖然日日都對住導師阿絹，但係都好開心嘅。
以前未做實習嗰陣，淨係間唔中做下節目，寫下稿，開下咪，如果曳啲遲交稿，最多都係用個幾星期就搞掂。但而家唔同，要做多好多幕後嘅工作，要mix segment啦、錄音、構思新節目，有時仲要返埋星期六日outing，去嘅地方就嚟走遍香港九龍新界！而做得最多就係街訪。 要一提，阿絹除咗好成功咁訓練我地混音嘅技巧之外，同時亦都訓練咗我哋擁有幾尺厚嘅面皮！要知道出去做訪問，貿貿然走入人地間鋪頭話想做訪問，俾人拒絕嘅機會十個當中會有八個，仲要毫不留情趕你走，真係面皮薄啲都唔知點算！
（藍在訪問小店）
不過認真，學到嘅訪問技巧真係唔少，多得阿絹成日叫我地出去做訪問，撞過幾十次板之後就慢慢會開始知道點樣設計問題、訪問嘅時候語氣或者用字有啲咩要注意，呢啲機會真係要做咗實習生幫手做節目先知道。而且做咗intern哩個月，我都覺得自己係成長咗，真係感覺到自己個責任重咗，除咗要mix好每個星期嘅segment，係要阿絹滿意喎！我嘅意思係要有交代 XD 要交到功課做節目，仲有要交稿啦，因為每日都對住妳基本上係走唔甩，我知我仲有稿未交，不過成長係要一步一步嚟嫁嘛，我會努力嫁啦。
因為做實習生知道咗更加多嘢，先了解原來平時阿絹係幾辛苦！我地淨係做少少嘢都嘆三聲，如果冇我哋幫手佢自己一個人做咪仲痛苦。不過，能力越大責任就越大，所謂能者多勞xd，而且成長係伴隨著痛苦嘅，冇咗我哋妳都一定得嘅，以後要加油阿絹！我會精神上同少少行動上支持妳嫁！
暑期實習生阿藍
沒有留言:
發佈留言