參觀電台 #02：「做一個DJ，都只有一個字可以形容－－難」

（當上完六堂訓練，幾個出爐的新新DJ參觀新城電台，這次他們又開了什麼眼界？）


好喇，去咗新城參觀，第一次睇住做節目，仲要喺個直播室裹面，好緊張呀!!!係嗰一個鐘裡面，好驚自己會唔小心出咗聲，搞到個氣氛好嚴肅。不過，原來一個節目係咁難做。平時就咁聽一個節目，d主持好多時都好似就咁上去up，淨係講下今日有d乜特別嘅歷經。原來一早就要寫好d程序，一陣要做d乜，而且仲用早一個鐘去對一次稿，對咗稿又未必會跟住份稿行。好明顯，要做好一個節目，做好一個DJ，真係一件好難嘅事，因為有好多事前準備要做好。

嗰日最深刻嘅係，學到幾時比反應。原來唔可以好似平時咁，不停比反應，要有d位唔可以比，如果唔係會阻住聽眾聽。呢樣嘢唔係睇住做節目，都未必會知喇。到個節目完咗，仲會去睇吓啱啱有邊d位做得好，邊d位做得唔好，雖然係雙聲頻道（編按：節目結束後，兩位導師同時就所屬環節作出檢討），但係就學咗好多嘢，例如：唔好有小動作，個人唔好搖嚟搖去等。

要開咪，做一個DJ，都只有一個字可以形容－－難。

2012新新DJ恒（前排圖右）

參觀電台 #01：「稿只係輔助，最重要嘅，都係要同對手交流」

(當上完六堂訓練，幾個出爐的新新DJ參觀新城電台，這次他們又開了什麼眼界？)

最後個堂要寫好自己新登場嘅介紹稿，仲同我地講寫得好先至可以跟佢地去新城電台參觀，搞到我鬼死咁大壓力，係咁改嚟改去，為嘅就係一張參觀新城嘅入場券。多得各位導師同師兄師姐比面，無插我份稿插到上天花版，所以我先至有咁好嘅機會去睇下佢地點做節目。

佢地開咪前會對稿，我係到聽之餘仲有Noi師兄係我隔離講解下做緊D乜，唔洗我聽到一頭霧水。原來寫好嘅稿都未必好岩洗，要係出街之前作出微調，同埋最重要令我明白到，稿只係輔助，最重要嘅，都係要同對手交流，咁先會RUN得暢順，觀眾都聽得舒服D啦。

到開咪個陣，我地都好好彩可以同大家叫聲「Hi」，不過hi完個句之後，我都唔敢出聲啦，驚會阻到個節目進行。唔知師兄師姐落場個陣會唔會驚到震架呢？我就唔知佢地喇，不過我企係到聽嘅時候我成個人都微微震緊......齋聽都驚，到我開咪點算？？

完咗節目之後，仲會坐埋一齊互相檢討，檢討下大家有咩可以做得更加好，過程之中KK盡顯霸氣，嚇到我地班友仔都唔敢出聲....

經過今次參觀之後，又令我對電台嘅認識多咗，令我更鐘意DJ呢個職業，希望有一日，我真係可以獨當一面咁坐係直播室開咪啦！

2012年新新DJ胡廸（圖中戴帽者）

訓練之後... #07：「記住自己點解入嚟，唔好比自己停下來」

(當經過八月、六堂密集式的訓練，新新DJ 突然發現... )


追夢征途完成咗第一部分啦！

首先真係要多謝幾位面試嘅導師們比個機會我入嚟。初初入去，一見到各位導師個樣好似唔係咁鐘意我。仲要樣樣表演爆咗時間。但最後都入到嚟。發現原來個個導師都獨當一面。多謝各位導師=]

仲記得當我朋友比個網址我嘅時間。諗過度過份錄音，戰戰競競咁寄。跟住收到電話去面試。最後興奮咁去到沙田。成件事好似係琴日發生咁。

兩個禮拜由零開始。第一次寫開咪稿，第一次腳震震入錄音室，真係好刺激，學到好多嘢。從前覺得嘅DJ原來比想象中辛苦、原來一份稿係咁難寫，原來呢個夢想唔係咁簡單易行。不過唔緊要！路從來都係難行。

DJ班嘅一班伙伴們！當做到辛苦，諗到頭爆都好。記住自己點解入嚟，唔好比自己停下來。同埋同埋~~仲有我搞下事咁嘛XD

我呢一個小小嘅後生仔，竟然可以擁有一個開咪追夢機會。無論未來有無機會踏足呢個行業都好。

完夢，無悔。

2012新新DJ飯桶

訓練之後... #06：「準備一個小時的節目... 前後最少要用上三小時！！」

(當經過八月、六堂密集式的訓練，新新DJ 突然發現... )


大家好！我是森神。

一直以來，我都有一個夢想，就係當上一名DJ ！因為我好鐘意講嘢同音樂！然而當中DJ 這個職業，除了能夠符合到我的興趣之外，更能夠當一個渠道去讓我與聽眾分享己想以及探討社會問題，引起關注！

但講到要成功當上一個 DJ，又是否那麼容易呢？上過這六堂的研習課之後，我能告訴你，完全不是！！在這六堂的課堂中，我真正了解到 Music SHOW，時事節目，清談節目，CHIT CHAT，音樂類別，創意設計，節目程序及策劃等。

在課堂中，我們遇上不少的困難，例如：如何寫稿，編寫廣告等！幸好有著導師們悉心的指導及解釋，令我們對DJ 的工作更為清晰！然而，在我進入DJ實習期之先，導師們帶了我走入新城錄音室（編按：是直播室），當晚我真正感受到要當好一個 DJ，除了要了解上述一切，還要做好時間控制，與控制員好好配合，留意自己的言詞等等！是多麼的緊張！準備一個小時的節目，要做足綵排以防出錯，以及事後檢討，前後最少要用上三小時！！還未計算設計節目喔！

所以，我真的很感謝導師們的用心，參加了這個課堂真的令我啟發了不少，承諾在往後的日子，我會盡我所能，表現最好的一面，以報答各位!

2012新新DJ森神

「係咁咖啦」

有時候覺得現在的後生仔女，有一種超乎他們年齡的成熟。他們會明白友誼原來不一定永固，又會早早開始計劃買樓。到底是什麼奪去本來屬於後生仔女的衝勁和夢想？

是因為一句咒語：「係咁咖啦！」

明明自己不喜歡的學科都要讀，是為了得到一紙學歷；
不想做的工作都要做，是為了生計；
不敢追求自己的夢想，是因為人人都沒有追求夢想，追不到夢想是正常。

不過，你是否甘心生活「係咁咖啦」？

早前，我遇到幾個不願意生活「係咁咖啦」的後生女。他們其中一些成員是從事室內設計和廣告，見到行內的浪費情況嚴重：讓客人揀牆紙的sample book，其實只需要其中一兩頁，而客人選定牆紙後，就整本棄掉，增加堆填區的負荷之餘，又浪費資源。他們不相信物料製造出來是為浪費，不認同浪費這種生活模式「係咁咖啦」，於是他們想做一些計劃把物料轉化再生，就是upcycling workshop。去年他們勝出了一個社會企業比賽，贏取獎金作為起動計劃的資金。於是他們就開展upcycling workshop，向室內設計公司回收裝修和建築材料的剩餘物資，例如：地氈、膠地板、牆紙，讓參加者發揮創意，把這些原本要送去堆填區的物資，變成各種有用的東西。我利用膠地板變成戒指和心口針，又有同學仔用磁磚做一副棋，亦有人用地氈變成記事簿的外套。

好多人都話人生「係咁咖啦」，但你絕對有權決定「唔係咁嘅」！

我的作品，見笑了。

決定生活「唔係咁嘅」，仲有一位去年參加「逆旅先鋒」的 血癌康復者，當時只有13歲的皓喬。這位男生長時間獨自面對病魔，打針、做化療都只有他一人。其實以他的體力，根本沒有能力應付要上上落落行山路的「逆旅 先鋒」。幸好他找到幾位朋友一齊參加，在過程中，隊友很支持他，不會嫌棄他行得慢，又會等埋他才起行，令他感到即使路途難行，也不是單打獨鬥。

人生可以 「唔係咁嘅」，你我也可以成為自己生命的Hero。只視乎我們有無闖過難關的決心。  

絹

訓練之後... #05：「一份有水準的稿，絕對唔係即興天才波」

(當經過八月、六堂密集式的訓練，新新DJ 突然發現... )


六堂課程，轉眼過去。

如果你問我六堂內學得最多係咩？答案就是寫稿﹑寫稿再寫稿。由第一堂的自我介紹，到music show﹑資訊節目以及talk show的每一份講稿，我們這班新新dj（新嚟新豬肉）都經過不斷被ban 稿再重寫的過程。有時被人ban稿ban到成份稿再改，都咪話唔痛苦。

不過，這其實是一場很好的訓練。

試問你我，未跌倒過，又點識得行路？同樣，未試過被ban稿，又點知咩係一份好的稿？而且寫一份好的稿對dj呢份工作真係好重要，因為電台節目無畫面，只係靠把聲去描述，無出色而獨特的內容，點留得住聽眾？

但一份有水準的稿，絕對唔係即興天才波，要係生活中積累豐富的生活經驗才做到。所以六堂時間，只係做dj的一個開始。

宜加，我已經係夢想的起跑線上。你呢？

2012新新DJ卓卓

訓練之後... #04：「訓練班係『AND』唔係『END』」

(當經過八月、六堂密集式的訓練，新新DJ 突然發現... )

作為一個典型嘅學生，我好很怕上堂><，但呢六堂嘅訓練班雖然朝十晚五點半，但卻令我唔願落堂…… 加入DJ班，我覺得自己好好彩，更好彩係遇到班好同學，大家一齊錄音、一齊度PROMO、一齊批評大家嘅功課 (還有首席、副評述專家，相當專業><)（編按：指班中某兩位學員），時間真係好快流逝，到咗唔使再上堂嘅果個星期四，大家竟然有D唔慣。

但更更好彩嘅係遇到我地嘅導師、嘉賓同咁多位師兄師姐，其實原來電台嘅Talk show、資訊節目、音樂節目都講求唔同嘅技巧，令我學多咗好多……但最重要嘅係，究竟我想透過大氣電波講D咩呢？一分鐘有意思的內容原來都好難講到咖(講到？講唔到？)所以呢樣嘢真係好值得我深思，亦都係我最深刻的內容。

對我嚟講，訓練班係「AND」唔係「END」，因為真正嘅訓練仲等緊我地！

2012年新新DJ Loita

訓練之後... #03：「下年，比我報多次嚟玩丫！可以嗎？」

(當經過八月、六堂密集式的訓練，新新DJ 突然發現... )


開心嘅時間真係會過得特別快！唔經唔覺，已經完成咗六堂嘅DJ課程喇！

其實真係好唔捨得，由當初「的」起心肝報名，錄demo，面試，上堂，到而家即將開咪，都好似係琴日發生嘅事咁。

上完六堂之後，我對電台工作嘅認識多咗，同我心目中嘅電台工作有D唔同，我明白要喺電台呢行發展，係需要好多嘅努力同熱誠架。

最深刻都係聽返師姐嘅分享，分享佢地點樣一步一步行上去，再去做到DJ。我地睇人往往只會睇到風光嘅一面，而忽略咗成功嘅背後係付出咗幾多嘅努力，聽完佢地嘅分享之後，我更加明白，要做一個DJ，要花一千倍的努力，同有比人一千倍的熱誠。

比起學到嘅知識，我更慶幸嘅係遇到一班好嘅同學，正所謂「三人行之中必有我師」，更何況係二十人？我好開心可以喺唔同人嘅身上學到嘢，學點樣用唔同嘅角度去思考。同佢地呢班人一齊玩，一齊學習，一齊錄音，係一件好開心嘅事，如果可以嘅話，下年，比我報多次嚟玩丫！可以嗎？

2012年新新DJ胡廸

和諧。河蟹

上個月我去歐洲，其中一站是瑞典，見到有茶包的設計是瑞典皇室成員，很有趣！每個茶包的上半部是皇室成員，人人都張開雙臂，下半部則是茶包。當茶包泡在熱水中，就彷彿他們在泡熱水浴。其實這是跟皇室開玩笑，某程度而言都算是「二次創作」，難得的是瑞典皇室不介意，甚至可以當成商品出售。

如果一個社會沒有這種自由表達的空間，又會變成怎樣？

今次歐遊，我還去參觀位於柏林的東德博物館。二次大戰後，德國被分成四個管治區，西部三個區是由英美法接管，東部則被蘇聯接管。由於政治理念不同，所以慢慢變成兩個勢力陣形，其後更分裂成東西德。 在東德，報章雜誌都有不少，有39份報紙，2個電視台頻道，4個電台，但別以為就有多元化的言論，因為眾多傳媒都只有一種意見，就是發放由中央審查員批核過的資訊。每個傳媒的總編輯，逢星期三都要跟中央委員會見面，接受要報導什麼，用什麼字眼報導等行政指令。

眾多傳媒，但內容單一，沒有異見，沒有衝擊，這種和諧社會，你想要嗎？



如果我們的社會連自由表達意見的自由都沒有，就沒有龍小菌這類二次創作歌手，實在太可惜了。

絹

訓練之後... #02：「曾經為夢想奮鬥過，至少，我無憾了」

(當經過八月、六堂密集式的訓練，新新DJ 突然發現... )

我係亞公，2012年嘅8月，我參加咗DJ班，去追求我嘅DJ夢。

短短六日，我試咗好多嘅第一次：第一次入錄音室，第一次不停諗橋寫稿，第一次改變我對電台嘅睇法……

喺DJ班，我學到做唔同節目嘅技巧同事前準備，每次都聽到入迷。而最大得著係識到一齊上堂，一齊玩，一齊追夢嘅朋友仔。每個人都會分享自己嘅故事，好高興識到大家。經過師兄、師姐同一班導師悉心嘅教導，明白到唔係講嘢叻就做到DJ，仲要寫稿要有創意，識得團體合作，時間控制要準，更重要係越ban越勇（編按：ban稿）。

我唔知將來做唔做到DJ，但係曾經為夢想奮鬥過，至少，我無憾了。

2012年新新DJ亞公

訓練之後... #01：「我明白到當ＤＪ不是想像中簡單」

(當經過八月、六堂密集式的訓練，新新DJ 突然發現... )

做 DJ ，原來很難。

完了六堂課，令我明白到當ＤＪ不是想像中簡單。

我一直以為DJ是一份「筍工」，幾個朋友在 chit-chat ，沒有壓力。笑著開工，笑著放工，寓工作於娛樂。但是，這六堂告訴了我這個想法是很天真。

第一堂是我印象最深刻的，當日下午大家都要錄一分鐘自我介紹。在預備的時候，我覺得寫稿是很容易的，與求職面試的自我介紹沒有大分別，都是將自己的姓 名、學歷、優點、缺點和嗜好通通說出口，把自己當成一件產品，然後向人推銷便對了。可是，導師們認為我的自我介紹太貪心了，說了很多不同的東西，但之間沒有關係，而且認為不夠深入和深刻，聽完很容易讓人忘記。這時，我便覺得要做好一分鐘都很傷腦筋，真是「咪前一分鐘，咪後十年功」啊！

DJ訓練課程令我多了思考，除了思考每堂的功課，例如 music show 、資訊節目等等，更重要是思考導師 Ernest 經常提及的問題─「為何是你開咪，而不是其他人呢？」。現在電台節目想開就開到，網上電台隨處可見，但是當大家都在討論相同話題的時候，吸引聽眾收聽就是─與眾不同，談何容易呢！

DJ不易做，幾年前DJ班畢業的師兄師姐，現在寫稿都會「彈稿」。雖然學做DJ的路很漫長，但是我不會放棄。因為我相信只要堅持到底，一定可以做到出色的DJ。

2012年新新DJ 鴻爺

Sudden lost

上星期，全港大大小小傳媒都不約而同地講同一件事，因為大家都很關心上星期一所發生的嚴重海難，至今已造成39人死亡。相信對遇難者家屬而言，這是一件非常難以接受的事。 他們的傷痛，我或多或少都能明白。

兩年前，我爸爸都是遇到意外，突然離世，充滿難過和遺憾。不過，後來我慢慢想通了，就是我爸最關心的是家人是否活得安好，只要我好好生活，就是完成了他最大的心願，所以為了不讓關心我的他擔心，我就努力收拾心情，好好過日子。

我相信每一位遇難者的心願，都是希望他的家人能夠平安地過日子。願安慰人心的上主親自與每一位遇難者家屬同在，祝福他們可以早日平伏心情，懷著離世家人的關心，堅強的活下去。

絹


這首歌是英國唱作女歌手Jem的作品，是送給她兩位過了身朋友，以及所有面對有親朋突然離世的人。



When you awaken in the morning's hush 
I am the swift uplifting rush 
Of quiet birds in circled flight 
I am the soft stars that shine at night 
Do not stand at my grave and cry 
I am not there; I did not die