9/28/2007

身在福中

童年時候父母為口奔馳,為了方便打點我倆姊弟的生活,家中請來女傭。母親擔心我們溝通不來,所以請的都是華籍。記得其中一位嬸嬸,柚木啡的皮膚,很白的牙齒,笑容很美。除了平日照顧我們,她總會抽私人時間做糕點,拿回來給我們吃,那些糕點都是顏色鮮艷,味道很好的。

長大後,偶爾走過南洋土產店,在玻璃櫥窗內重遇這些糕點。急不及待每款買一個,但怎樣吃都吃不到回憶中的那質感和美味。回到家中,決定上網找食譜自己做,搜索之下才知道原來這些糕名為 "娘惹糕"。而其中嬸嬸經常做的七彩千層糕,原來要將漿糊分成約干份,再混入不同香油,然後每加一層漿就需放入蒸籠蒸一次,麻煩得比做煲仔飯更甚,比焗蛋糕更花時間。

原來總有人無聲無息的為你付出很多,你是否也只是在大口嘴嚼這福份呢?

新新DJ阿金

9/27/2007

Nothing is impossible

這年夏天,我經歷了許多以前一直未敢奢想的mission impossible。


會考放榜,人生第一份工作,突破DJ班,入讀新學校。從害怕、逃避、羞怯、猶豫,到完成、畢業。一路上我想過放棄、離開。但總是要先經歷過艱苦的磨練後,人才會學識欣賞甜,珍惜甜。


- 日夜鑽研past paper,考試時盡傾所學。考畢各科後自然玩得盡興輕鬆。
- 按照要求指示辦事,忙碌過後,自會珍惜跟一眾同事的happy lunch hour。
- 經過「炒粉」,「被彈」,完成功課後倍添滿足感。
- 雖然要重新認識同學,但相對地增加了許多新朋友。得到支持,信任,友誼是快樂的源頭。


有恆心,有勇氣,impossible is nothing!


新新DJ Christy

9/25/2007

煙花待綻放

曾以為自己會一事無成 ; 曾以為自己會無所事事 ; 曾以為自己會簡簡單單過一輩。


在一次的會考風波中,我見証了香港教育制度的腐敗,也見証了努力得不到回報的失落是源於什麼。


稱不上是一個精英學生,放榜前夕,緊張萬分。稱不上是一個勤力學生,放榜前夕,內疚萬倍。


正正因為如此,才更突顯出八月八日的珍貴。
這天,眼淚、惶恐充斥著學校,當我知道自己能「拉車邊」走上中六的時候...很後悔自己沒有盡全力去讀書溫習。


輕視了這場無情的考試,使我人生中得到徹底的覺悟…有很多比我還要努力的同學得不到預期中的成績,他們哭,我卻比他們哭得更利害,因為我實在攪不清楚:「為什麼努力的人沒有得到回報 ?」


後來老師跟我說,努力的人卻不能辦好事情,証明他們沒有能力,他們的天才不在於此而已。心中泛起莫名奇妙的感覺,同學們能真正在別的方面發展嗎 ?


我為著他們的前途而感到擔憂,也許「天生我才必有用」是對的。又或者有些同學還沒有及早發現自己的天份在那? 但願如此吧 !


總相信,千里馬遇上伯樂才有機會向前直奔,展示才能。我們這些在船上的小煙花,就靜待綻放之時吧 !!


新新DJ Joffe

新新DJ開咪記

9月22日開咪日!

雖然今次唔係我第一次開咪,卻是我第一次以主持的身份出現在一個電台節目裡。我打從心底心裡感謝07突破DJ訓練班給我這次開咪的機會 =]

如果問我給自己的表現打幾多分,我會給自己50分*剛剛合格*!會給自己合格的分數,是因為我起碼沒有令節目無法進行下去~*勉強可以學亞絹講聲:fair啦!*

至於我唔滿意自己嘅地方就多嘍!=u= 喺開節目前其實我就真係零緊張,唯一嘅障礙係我那個唔係咁生性嘅喉嚨!我開咪前足足啪咗十幾粒喉糖先至好少少!話唔緊張其實都係會唔小心緊張咗嘅…話哂都係人地嘅第一次嘛…*羞*

開節目前再dem一次份自我介紹比絹,KK同Ernest聽…
回應:唔得!快!食哂D字!減!
那時,仲有5分鐘就開始喇!D緊張隨即咇哂出嚟!點好呢?點好呢?*當時我有盡量掩飾下我嘅惶恐*

無稿嘅talk show真係有d上戰場feel!好緊張刺激!講嘢要舉手,有d位唔小心真係當咗自己喺度同friend傾計!標咗一句出嚟,疊咗d聲 *大忌 really sorry >~<*
呢個時候,真係發現絹同KK嘅默契真係唔係普通嘅好!古語有云:「台上一分鐘台下十年功」,真係講得好啱!

要做一個稱職嘅好DJ,真係唔係一件容易嘅事!要同個Partner合作無間真係要時間浸出嚟!絕對唔係一朝一夕可以做到嘅事呢!

由於我有位朋友仔錄低咗個節目send返比我聽,我就將個節目從頭聽咗3次,仲mark低我對自己唔滿意嘅地方,嚟個賽後大檢討!我發現到喺絹同KK嘅「襯托」下,我把聲真係好薄唔太入咪 *好想搵到自己真正嘅嗰把聲,不過去後山嗌好危險…我會考慮出去學下*
另外,平時傾計講嘢唔太覺,我嘅口齒唔太清,講嘢速度偏快…噢!實在太太太太太太多嘢需要改進了!

不過我係唔會灰心嘅!我會繼續努力嘅!我會讓大家看到我的進步!*決心*

新新DJ Ceci

9/21/2007

單身「酸」言

躺在搖晃著的浮床,我的思維又不受控地胡思亂想,跟浮床一樣起伏不定。看著灰藍色的天空,心情驀地灰沉沉的,看著身邊的好友全都墮進愛河,不禁嘆息,當了多年電燈膽,真有點...唉!

燒烤時,他們溫馨地烤著蜜糖雞翼,不!是一隻普通不過的雞翼,但他們吃起來,卻比蜜糖雞翼更甜美,唉!

忽然腦海幻想著某好友的婚宴的場面,到期時我會是攜眷出席,還是沉默地坐在一旁,為他們暗喜呢?

新新DJ Gabby

9/19/2007

收支平衡

無論做生意、經營感情定係學業,係未有得賺前都想起碼可以做到收支平衡:
比咗d$出去唔賺,都梗係希望唔會蝕啦!

投入咗d感情得唔到extra嘅,都梗係希望唔會得到比自己付出嘅少啦!
讀咗d書拎唔到滿分,都梗係希望拎到個與付出成正比嘅分數啦!

但係想歸想,想做到「收支平衡」真係唔容易囉!  因為係日常生活中要做到呢點,同我地拎住條account數嚟計唔同,唔係小心d,睇清楚d,計清d就可以balance到! 喺現實生活中,你點死計爛計,都總有d外在或者內在嘅因素影響吓你...咁你balance唔到,可以點?

唯有計過囉!

朋友,即使你鍾唔鍾意計數,由於有d數係唔到你唔計,所以都係努力啦! 我喺度祝你地同埋自己,都可以做到「收支平衡breakeven!」

新新DJ Ceci

9/13/2007

學會珍惜‧不想後悔

充當好友的專用攝影師,在廣大的商場裡,我無視旁人的目光,投入地尋找最佳的角度,想把當
晚的一一記錄下來……

透過攝錄機的螢幕,望著台上認識多年的好友,心中有說不出的感動。 我發現到她把每一次表演都當作是唯一一次的表演機會,盡量做到最好。

在那個聽出耳油的晚上,我的腦海生了一個疑問:
「很多時候都是no next chance的,而我,又曾否珍惜過我所擁有的呢?」
的確,人就是在失去後才懂得珍惜吧。 當女兒興高采烈的向媽媽炫耀:「我今天很努力的寫notes,也很留心上堂呢!」

女兒向媽媽炫耀,是想得到一句:「哇!真係乖喇!」嘅稱讚吧!
怎料卻換來媽媽中肯的一句:「這不是你的本份嗎?你早應該這樣做了!」
女兒在讀書方面從來都沒有怎麼努力,有時僥倖被她拿了不錯的成績,也被她考進了人所渴望入讀的好學校,但她沒有好好珍惜學習的機會,常找藉口比自己懶惰去,最後她不再僥倖……

她想:「如果可以從頭來過,我一定會好好讀書的!」
當女孩與已分手的前男友同檯食飯卻各自修行,想當日的甜蜜不再,他們再沒有對話,再沒有眼神接觸,當同檯的朋友正聊得十分開懷時,她卻在納悶…她在想為什麼現在會變成這樣?

她在想:「如果可以從頭來過,我不會提出分手的!」 當最後一班車走了時,她在想:「如果可以從頭來過,我一定會早走的!」

當買了的東西變得不合心意時,她在想:「如果可以從頭來過,我一定不會買的!」
當說錯話時,她在想:「如果可以從頭來過,我一定不會說的!」
當做錯事時,她在想:「如果可以從頭來過,我一定不會這樣做的!」

可是,世界沒有這麼多個如果,為何不一早好好珍惜自己所擁有的呢?
後悔多次以後,女孩學會把握現在,珍惜身邊的一切,盡可能做好每一件事,盡可能對人好,盡可能珍惜每一個機會……

所以她也要把握今次學習的機會!

她不想再後悔了。

新新DJ Ceci

9/11/2007

DJ班餘生記 12

記得小時候的夢想是當一位DJ,當一個能夠真真正正幫助他人的好DJ。直至有一次,DJ麥潤壽對我說的一席話:「你認為當DJ真是如期中的好玩嗎? 試想想你每天對著麥克風,自己一個人說話,然後每天不斷聽著近似的電話,解答著差不多一樣的問題,你還有興趣去當一個DJ嗎? 別人在大時大節過新年時,你卻要留守電台,說著無聊話,心知道聽眾當然是少之又少,如此一來,你還想當一位DJ嗎!?」

聽過後,我不再想去做一位DJ。

然後,磨了些日子,卻毅然參加了DJ班。一切一切發生在我意料之外。

面試當天我遲天,氣急氣喘的,在毫無預備底下,有人便對我說:「遲到o個個,到你讀喇。」

心中不禁嘩了一聲,稿也未看得清,便要讀了…再者,問題時間,表現十分惡劣,直至現在還沒有弄得清為何我能入選! 當有人打電話通知我入選時,我再三反問她有沒有弄錯,哈哈哈哈哈哈,十分「傻仔」。

上課的時候,我表現得似個小學生,同學們都當我是個小朋友,雖然只是短短六課,但我們相處得十分好,感情雖不說得上十分深厚,但卻有了一定的厚度,我相信這厚度會隨著我們來年的合作而愈增愈厚的 !

最後,I LOVE YOU ALL !!!!!

07年新新DJ JOFFE

DJ班餘生記 11

從六堂的課堂中,我學到甚麼?(思考中...)大抵也能學到當DJ的基本技巧吧!當一個DJ,最重要的是動人的聲音?是鬼馬的用語?我說最重要的是內涵,六堂中令我發現到自己只不過是一副,說話多多,沒有內涵的軀殼,相信沒有一個速成班能令自己成為一個有內涵的人吧!幸好余非小姐告訴我,看書是其中的一個培養方法。

那次邀請車車當嘉賓分享,我忽覺自己渺小,彼此都是二十餘歲的青年,她,已是位知名DJ,而我?仍是一個不知自己怎麼樣的小子。

究竟只是個口水多過浪的小毛頭,還是希望能以說話來作為自己職業的有心人呢?相信在這裡我會找到答案。

07年新新DJ雞髀

9/10/2007

錄音啟示錄

首先鳴謝亞絹, 影同風火劍塚(貌似"反斗奇兵"入面專破壞玩具果位小朋友)嘅幫助, 我地嘅final project終於完成了!!! (組員有apple, winnie, cow)

今次錄呢個segment總算順順利利, 而且笑料百出呀, 當中更加體驗到一句古語:"未到八十歲都唔好比飽飯女人食"係唔啱架!!!

話說我地嘅segment由apple負責聲演v.o, 而對白分別有2長3短, 錄緊1長1短中, 大家發現有丁點唔對路, 對比之前錄其他角色嘅進度, 速度有如56k對寬頻, 而且apple有一個習慣, 就是經常"勒韁"(意指馬跑緊嘅時候突然被抆停, 然後唔係隻馬咩咩聲, 係我地咩咩聲~) 情況變得更壞, 有如56k仲成日hang機...

過埋食飯時間, 我地仲係錄緊1長1短的v.o, 有小小肚餓嘅我地作出咗一個可能係呢日最錯嘅一個決定:

"錄完v.o先食飯!!!"

心想要一氣呵成, 可是還是56k加hang機! 好在人天生係有一個崩潰機制, 哈哈~ (p.s: 突破canteen嘅熱朱古力超好飲!)

食完飯返嚟, apple變咗100億能量戰士, 錄剩低嘅1長2短比光年仲要快! 呢個速度可以用一條I.Q題嚟解釋, "小明同一架火車鬥快, 之後小明贏咗, 點解? "

答案係: " 因為小明真係跑得好快!

擁有呢個快過寬頻嘅速度, 原來只需要一餐飯... 所以我地嘅總結係, 如果各位人兄有嘢要搵apple錄, 最緊要最緊要係比佢飽餐一頓, 哈哈~

除咗證實"未到八十歲都唔好比飽飯女人食"係唔啱之外, 我地仲每人多咗一個新名...

教育tongue: xppxx (新一代新聞之花)
勁捲tongue: wxnnxe (新一代天后sammi)
唔用tongue: xxx (新一代新新DJ)

有人可能會問, 點解我地係咩咩tongue而唔係咩咩tone呢? 咪就係有人講tone講咗tongue囉~而亞絹呢, 我決定都幫佢改一個, 就係: "i'm so sorry絹", 大家只要留意下佢係咩時候講“i'm so sorry”就會知點解架啦, 哈哈~

新新DJ Cow

DJ班餘生記 10

一枝竹仔易折彎,幾枝竹一扎斷節難。集腋成裘,聚沙成塔,單獨的存量不可跟合作的強大相比。這是老生常談的道理,而我在這六點五課DJ訓練課程領悟得更透徹。六天在山上突破青年村的日子,遠離繁囂加上電訊服務不覆蓋的情況下,大家都專注於學習上,也只好如此。沒有外來的騷擾,大家也就更融和,合作。

在學習廣播守則,基本原理時,大家各持筆記,讀到恍悟,有趣的位置都會此起彼落地發出「哦」、「咦」、「是這樣嗎?」……腦震盪構想相關資料又會互相提點,伸延出更多好點子。就這樣你一言我一語的對話交錯,令我對教授的知識資訊的認知更深刻。不經不覺營造的和諧合作氣氛,使學習變得更輕鬆更可愛!

但明明是六課,那零點五又從何冒出來呢?這可是算上參觀新城電台那天。學過理論和錄音技巧,實戰op機和親歷直播節目時更顯出合作的重要。器材控制考自我動作的靈活配合,fade out track 1同時turn o mic 1,再轉cut (MD),都是「千手」才能應付的task。真正上場就更繁複。一人節目是「一腳踢」,口在說腦在轉手在op:邊應付機器邊要有條不紊地說著當天的題目;多人節目如talk show ,又要互相溝通協調得宜,避免疊聲,搶說話,「炒粉」。

除了天份和努力,我認為合作也是做好一件事的重要因素。一個人可以讀好書,但一班人一起學習,氣氛會更融洽和令人享受。從合作中學習到的是更深刻更「入腦」。期望來年,來年,再來年,都有機會與這班新新DJ合作,繼續跟新新導師阿娟,Ernest,KK學習。

07年新新DJ 靄霖

9/07/2007

DJ班餘生記 9

套用林狗
talkshow一句:『志偉話過觀眾係需要睇重播嫁!』

我地即刻去片…

新城面試日,落到去同接待處姐姐講句:『我係嚟黎面試咖!』
接過訪客用貼紙,諗住一陣再落黎,竟然發現右手邊有一堆古怪嘅人,佢地當中望天花望地下合埋眼都有,唯一共通點就係:一齊拎住張紙條仔口中唸唸有詞:"波耶波蘿me,波耶波蘿 me…"(設計對白)

感覺好怪 = =!
隔陣落返嚟,接過紙仔叫我準備下一陣入去面試。噢!原來係份讀稿!自己記性差,唔背,入去死就死把啦~

面試時4打4,有趣度 0,飛帶。

入學第一日,遲到 bor .......
阿絹「依牙鬆弶」咁講做傳媒守時好緊要 (乘機同阿絹講聲:Sorry !)
之後開始玩遊戲,當然大家唔太願啦!但一句:『有時一朝早就開咪仲夢鬆鬆咪出事囉!』
遊戲玩完坐定定聽書又聽埋,大家要飯後各自度一篇稿,一陣去錄音,劈頭都話咗要全口語連埋助詞寫,諗住抽下水寫咗列點格式, 結果一入錄音室就知死啦!

雖然得6堂,但每個細節都落緊錢入你袋咖~(純廣告 )
打後每堂都響爆笑聲,串嘴聲,尷尬笑聲中渡過。炒咗粉唔緊要,同學仔會再三扮吓你,咁你咪下次唔會再炒返一樣嘅粉囉! 所以真係好冧~同學仔,勁愛你地喔! ^O^
不過最過癮都係Ernest同阿絹扮OL講是非果幕! Woo ~真係估佢唔到呀!

都係果句:『多謝Ernest,阿絹, KK咁訓身教我地, Hehee』
嚟緊嘅時間大家一齊踩油啦!兄弟姊妹們,上呀~!!

07新新DJ阿金

9/06/2007

新新DJ炒粉記 (電台術語,即出錯)

video

新新DJ去op機(電台術語,即控制機件),有緊張,不知所措,懶醒,發呆... o係佢地毫無還擊之力下,殘酷地拍下佢地的狼狽相!嘩哈哈~~

P.S. 特別鳴謝攝影師Ceci~

再來一張大合照~


車車o黎DJ班同新新DJ們分享做節目心得~呵呵

9/05/2007

DJ班餘生記 8

今次有幸參加突破DJ訓練班, 除咗開心之外, 仲要多謝俾機會我嘅導師, 喺課程入面, 我學咗好多關於DJ嘅基本知識, 亦有機會入錄音室, 係一件好難得嘅事! 雖然只有基本6堂, 但已經好睇得出自己係咪真係咁鍾意DJ嘅工作, 喺當中睇得出努力同唔努力嘅分別, 所以我知道自己如果有心做的話, 呢樣嘢難唔到我!

電台嘅創作空間係無限, 但係有一個框框限制咗你, 所以既有趣又有挑戰性, 希望喺未來嘅日子更加努力去做好D!

07年新新DJ 煜

9/04/2007

DJ班餘生記 7

八月三十一日。

對幼稚園生來說, 是一個開學日

對小學生來說, 是一個暑期作業衝刺日

對中學生如我來說, 是一個不用等待九月一日開學的星期五

對一眾白領來說, 只不過是一個期待Saturday fever 的工作天。

那我為什麼要提醒自己, 提醒你這個理應毫不起眼, 佔上八月日曆一格 2x2的日子?
因為從我收到阿絹的電話起, 我多了一重身份——我是07-08年度的新新 DJ。
今天是交blog稿的死線。

死線的意思大概是: 如果blog稿你一日未交到阿絹手中 , 你就會死。

所以, 懶惰如我, 都會盡力在十二時正前寫好感想。

參加DJ訓練班, 是因為好友無意間提起。

想起自己找了一個月暑期工仍然坐冷板凳, 想起自己中五放榜後, 如果成績未如理想, 日日在家無所事事, 我老媽一定不會對我客氣的模樣, 我決定 : 今年暑假我要參加DJ訓練班!
六月三十日, 又是一個死線。

我把聲帶send了出去, 餘下來, 唯有等待面試的通知, 和想想之後的時間如何分配
"你知道自己一定可以面試嗎? 好像說會選人的。 "好友問。
"我就知我倆可以的, 信我。" 我就愛說這種自大話。
為何不? 自認為有能力的人最有勝算。

八月開始的訓練班, 從遊戲開始。那些要記人名, 認識大家的遊戲。我是最後一個被叫到的, 還要我做足咀型, 對方才記起那種。我就知道 , 我要在第一天就讓人記得, 是不簡單的事。

接下來的一天, 導師和班長教曉了我: 當一個有特色的人 , 別人才會記得。特別是DJ這個行業, 只認聲的工作, image從來都重要。當天, 我多了一個稱號: 賤嘴會會長。 顧名思義, 張咀不說場面話, 殺傷力無窮成了我的特點。

這六堂訓練班, 導師最重視的不是學員們的稿寫得如何, 不是懶音咬字 , 這六堂下來, 聽得最多的, 是準時。

守時是DJ工作的重要一環。因為做live show, 如果主持人遲到 , 實在不知道如何收場。對同事, 對聽眾所帶來的不便, 是我們不能想像的。

所以接下來的訓練, 大家都盡力守時。避免遲到罰款, 固然是其中一個原因 , 而我相信驅使大家的更大理由是——大家的責任心。

現在是十一時三十分。離死線還剩三十分鐘。 如果再有機會和大家分享, 我也會準時的 ,ok?

07年新新DJ Christy

9/03/2007

DJ班餘生記 6

一切由一條link開始... 登上了看見車車, 亞Bu的名字, 再看看價錢, 於是就寄出demo了...

不久之後, 就收到一個面試通知, 而且在新城舉行呢, 還記得面試那天, 第一次去電台興奮萬分, 但係一入到房, 個心跳到想爆咁滯, 個嘴震到想跌出黎咁, 如果十係最緊張的話, 我有二百!! 最後要多謝亞絹, kk, Ernest比o左一個機會我~

六堂的DJ course眨下眼就完了, 除了認識自己之外, 還發現了一樣從小已經知道但總是不會做好的事------做好準備

準備工夫除了是尊重工作本身之外, 而且是做好一件事的不二法門, 就像每堂的一份功課, 如果之前無做好準備, 搵好資料, 寫好稿, 計準時間, 量你再有什麼天才, 聲線再怎樣動聽, 當走入錄音室, 粉還是炒硬的!! 而且, 機會可能只有一次, 把握唔到的話, 可能會無下一次, 又可能要再用十年o既時間o黎改變人地對自己o既睇法, 所以除了羨慕別人的成功外, 也要看看他們背後的故事, 小儀也說過, 叻到好似森美咁, 第一次開咪做節目之前, 都要捉住佢dem左4次之多!!

哈~對不起, 好像令氣氛突然嚴肅了~

之後要講一講同學仔啦~ 講真...呢班人真係好奇怪~ 第一堂剛剛識第二堂已經比人話好鬼嘈~
好開心可以同你地上呢六堂, 一齊扮人, 一齊偷笑, 一齊幫人地個朋友解答問題, 一齊揭示戀情o既發生, 仲有大財主罰錢比我地食野, 不過你地真係好嘈, 而且把嘴好...

好唔捨得你地, 好在以後仲有每月一聚, 如果可以18個人一齊on air就好了…
最後, 壓軸係鳴謝亞絹, KK, Ernest, 亞影, 安琪, 組媽, 多謝你地比我地一個起步o既機會, 帶我地玩遊戲, 教我地錄音, 寫稿, op機, 搵人同我地講好正o既talk, 仲要答埋我地o既騎呢問題~ 辛苦你地了

07新新DJ Cow